बुलढाणा: शहरातील नामांकित आणि जुने व्यावसायिक प्रतिष्ठान असलेल्या ‘प्रकाश जनरल स्टोअर्स’चे मालक अमित प्रकाश नारडिया (वय ४४) यांनी गळफास घेऊन आत्महत्या केल्याची अत्यंत धक्कादायक घटना आज सकाळी उघडकीस आली आहे. या अमित नारडिया आत्महत्या प्रकरणामुळे बुलढाणा शहरासह संपूर्ण व्यापारी विश्वात मोठी शोककळा पसरली असून, त्यांचे कुटुंबीय आणि मित्रपरिवार या घटनेने पूर्णपणे सुन्न झाले आहेत.
नेमकी घटना कशी उघडकीस आली?
मिळालेल्या माहितीनुसार, मलकापूर रोडवरील आपल्या निवासस्थानी सर्वात वरच्या मजल्यावरील बेडरूममध्ये अमित नारडिया रात्री एकटेच झोपलेले होते. आज सकाळी बराच वेळ होऊनही ते खाली न आल्याने आणि फोन कॉलला प्रतिसाद न दिल्याने कुटुंबियांना शंका आली.
अखेर सकाळी ८:१५ वाजेच्या सुमारास त्यांचा भाऊ आशिष नारडिया यांनी खिडकी तोडून बेडरूममध्ये प्रवेश केला असता, अमित हे छताच्या पंख्याला गळफास घेतलेल्या अवस्थेत आढळून आले. हे हृदयद्रावक दृश्य पाहून कुटुंबियांनी एकच हंबरडा फोडला.
आमदार संजय गायकवाड यांची निवासस्थानी धाव
या घटनेची माहिती मिळताच बुलढाण्याचे आमदार संजय गायकवाड यांनी तातडीने मलकापूर रोडवरील नारडिया यांच्या निवासस्थानी धाव घेतली. अमित नारडिया हे आमदार संजय गायकवाड यांचे अत्यंत निकटवर्तीय मानले जात होते. आपल्या जवळच्या सहकाऱ्याच्या अशा अचानक जाण्याने आमदार गायकवाड यांनाही मोठा धक्का बसला आहे. दरम्यान, पोलिसांनी घटनास्थळाचा पंचनामा करून मृतदेह उत्तरीय तपासणीसाठी (Post-Mortem) जिल्हा सामान्य रुग्णालयात पाठवला आहे.
टोकाच्या निर्णयामागचे कारण अद्याप गुलदस्त्यात
नारडिया परिवार हा शहरातील एक मोठा आणि प्रतिष्ठित परिवार आहे. अमित नारडिया यांच्या पश्चात तीन मुले आणि मोठा आप्तपरिवार आहे. त्यांनी इतके टोकाचे पाऊल का उचलले, याचे नेमके कारण अद्याप अस्पष्ट आहे. घरगुती वाद, आर्थिक विवंचना की आणखी कोणते कारण यामागे दडलेले आहे, याचा तपास पोलीस करत आहेत.
इतरांचे वाद सोडवणारा आणि नेहमी हसतमुख राहणारा मित्र अशी अमित नारडिया यांची ओळख होती. इतरांचे कलह मिटवणाऱ्या अमित यांना स्वतःचा कोणता ताण मृत्यूपर्यंत घेऊन गेला, असा हळहळ व्यक्त करणारा प्रश्न आता संपूर्ण बुलढाणा शहराला पडला आहे.


