सध्या उन्हाळा सुरू असून त्यात सुद्धा मे महिना चालू आहे. रणरणत उन आणि जीवाची होणारी लाहीलाही यामुळे मनुष्य फारच वैतागलाय. काही वर्षाआधी उन्हाळा आला तरी जास्तीत जास्त तापमान हे २५ सेल्सीयस च्या घरात असायच त्यामुळे गरम वाटत असला तरी आल्हाददायक असायचा. परंतु काही वर्षापासून हाच उन्हाळा नकोसा वाटायला लागलाय. २५ सेल्सीयस च्या घरात असलेले तापमान आता ४० च्या वर गेले आहे. दिवसेंदिवस उन्हाचा कडाका आता वाढतच जाणार आहे. त्यामुळे उन्हापासून बचाव करणे आणि आपल्या शरीराची काळजी घेणे आवश्यक असते.
उन्हाळ्यात स्वत:ची काळजी कशी घ्याल ?
उन्हातून फिरताना डोळ्यांवर गॉगल घालावा. टोपी, स्कार्फ, सनकोट यांचा वापर करावा.
तसेच सनस्क्रिन लोशनही वापरावे. उन्हाचा त्रास होऊन मळमळत असेल तर वाळ्याचे पाणी प्यावे.
कमळाची फुले टाकून पाणी प्यावे. नैसर्गिक आंबट पदार्थ खाणे. उदा. चिंच, लिंबू, आमसूल, कैरी आदी. याच पदार्थांची सरबतेही मोठ्या प्रमाणात प्यावीत.
डोळ्यांची आग होत असेल तर, डोळ्यांवर थंड पाण्याच्या घड्या ठेवाव्यात. तसेच काकडी, कलिंगडाच्या साली डोळ्यांवर ठेवाव्यात. तळपायांची, हातांची आग होत असेल तर, खाद्य चंदनाची पाव चमचा पावडर नियमित खाणे.
पिंढ-या दुखत असतील तर, उन्हाळी फळे मोठ्या प्रमाणात खावीत. उदा. कलिंगड, खरबुज, शेंदाडं, द्राक्ष, काकडी आदी. डिहायड्रेशन होत असेल तर, इलेक्ट्राल पावडर पाकिटावर दिलेल्या प्रमाणातच पाण्यात मिसळून प्यावी. लाल तांदूळ किंवा अख्खा बासमती तांदूळ एक चमचा घेऊन त्यामध्ये एक ग्लास पाणी घालावे. ते उकळून त्यांची पेज करावी व तूप, मीठ घालून खावे. जुलाब/अपचन होत असेल तर, कुटज आणि सुंठाची पावडर करून अर्धा चमचा खावी.
उन्हाळी लागली तर, एक चमचा धने, एक चमचा जिरे पावडर एक लिटर पाण्यात 12 भिजवून ते पाणी प्यावे. वारंवार अपचन/अजीर्ण होत असेल तर बेलफळाचा मुरंबा खावा किंवा बेलफळाचे सरबच प्यावे.
अंगावर रॅश, घामोळे येत असेल कर वाळा व चंदन पावडर अंगाला लावावी. उन्हाळ्यात थंड पाण्याने आंघोळ करावी. आंघोळीच्या पाण्यात वाळा, चंदन, नागरमोथा, कमळाच्या फुलांचे चूर्ण, गुलाब पाकळी मिसळून आंघोळ करावी. अतिउष्णतेने डोके दुखत असेल तर जेवणात नियमित कांदा खावा. उन्हाळ्यात लसूण खाऊ नये.
हे सर्व जर आपण नियमीत केलेत तर हा उन्हाळा सुद्धा आपल्याला आल्हाददायक जाणार यात शंका नाही.
आला उन्हाळा, तब्येत सांभाळा
