जगातल्या कुठल्या कोपऱ्यात आणि कुठल्या क्षेत्रात भारतवंशीय नागरिकांची घोडदौड नाही, हे सांगणे सध्या कठीण बनले आहे. अमेरिकेच्या शेती, संशोधन व्यासपीठांपासून ते राजकारण आखाडय़ापर्यंत, युरोप खंडात करी, चिकन टिक्का सादर करण्याऱ्या रेस्टॉरण्ट साखळी मालकांपर्यंत, ऑस्ट्रेलिया-न्यूझीलंड क्षेत्रांतील उच्चशिक्षित व्यावसायिकांपर्यंत, आफ्रिका खंडात मोठय़ा गुंतवणुकीसह प्रभाव पाडणाऱ्या श्रीमंतांपर्यंत आणि आखाती राष्ट्रांत मरमर राबणाऱ्या गरिबांच्या जथ्थ्यांमध्ये भारतीय वंश हा लक्षवेधी घटक ठरला आहे.
भारतीयांची ही सर्वव्यापी उपस्थिती नेहमीच क्षणिक अभिमानाचे सुख देणारी असते. बुद्धीला चालना देणाऱ्या आंतरराष्ट्रीय ‘स्पेलिंग बी’सारख्या शब्दस्पर्धामध्ये गेल्या काही वर्षांपासून भारतीय वंशाचे विद्यार्थी विस्तारत असलेले यशोशिखर मात्र भारतीयांच्या बुद्धिसामर्थ्यांचे वैशिष्टय़ ठरत आहे. याच आठवडय़ात अमेरिकेतील कठीणोत्तम स्पेलिंग बीमध्ये परीक्षकांकडे शब्दच शिल्लक न ठेवणाऱ्या भारतीय वंशाच्या विद्यार्थ्यांचे वृत्त बौद्धिक जगताच्या कौतुकाचा विषय बनले आहे.