बुलडाणा शहर व ग्रामीण भागात मोठ्या उत्साहात होळी व धूलिवंदनाचा सण आज साजरा करण्यात आला. यावेळी अनेक ठिकाणी पारंपरिकरीत्या होळी व धुळवड साजरी करण्यात आली. बुलडाणा शहर आणि ग्रामीण भागात देखील पारंपरिकरीत्या गुरुवारी होळीचे दहन करण्यात आले.

सर्वप्रथम शहर आणि परिसरात काल ठिकठिकाणी होळी पेटवण्यात आली. यावेळी सुवासिनींनी होळीची पूजा केली. शहरामधील प्रत्येक सोसायटीने देखील आपल्या सोसायटीसमोर होळी दहन केली. आज होळीचा दुसरा दिवस म्हणजे धुळवड. आज धूलिवंदनाच्या दिवशी देखील शहरात मोठ्या उत्साहात रंगांची उधळण करण्यात आली. यामध्ये तरुणाईचा पुढाकार होता. शहरालगतचे हॉटेल, रिसॉर्टमध्ये देखील मोठ्या प्रमाणात गर्दी होती. शिवाय शहराबाहेरील अनेक शेत-मळ्यात अनेकांनी मनसोक्त होळी खेळून आनंद द्विगुणित केला. धुळवड असल्याने अर्थातच व्यापारी प्रतिष्ठाने बंद असलेलीच दिसून येत होती. तर चौकाचौकात तरुणाई आपल्या मित्र आणि आप्त जणांसह होळीचा आनंद घेतांना दिसून येत होते. दिवस मावळतीकडे झुकलेला असतांना सुद्धा अनेक ठिकाणी धुळवड संपलेली नव्हती.