आज दुपारी एसटी महामंडळाची बस जळगाव जामोद येथून बुलडाणा येथे प्रवासी घेऊन येत होती. दरम्यान येरळी येथे येताच पूर्णा नदीच्या पुलावर समोरून येणाऱ्या भरधाव कंटेनरने बसला दिली. यामध्ये कंटेनर चालकाचा घटनास्थळीच मृत्यू झाला. तर इतर जखमी असण्याची शक्यता आहे.

नेहमीप्रमाणे आज दुपारी महाराष्ट्र राज्य परिवहन महामंडळाची बस जळगाव जामोद येथून बुलडाणा येथे निघाली होती. येरळीतील पूर्णा नदीच्या पुलावरून बस जात असताना विरुद्ध दिशेने येणाऱ्या कंटेनरने बसला जोरदार धडक दिली. दुपारी एकच्या सुमारास हा अपघात झाला. नदीवरील पूल अरुंद असल्याने भरधाव कंटेनर बसला धडक देवून थेट नदीपात्रात कोसळला. उंचावरून कोसळल्याने कंटेनर चालकाचा जागीच मृत्यू झाला तर इतर जखमी असण्याची शक्यता आहे. कंटेनरने धडक दिल्याने बसचा मागील भाग पुलाखाली गेला. परंतु पुलावरील दगडांमुळे बस पुलाखाली कोसळली नाही आणि सुदैवाने जीवीतहानी टळली. बसमध्ये ५५ प्रवाशी प्रवास करीत होते. कुणीही जखमी झाल्याचे वृत्त नाही. या अपघातामुळे दोन्ही बाजूंची वाहतूक विस्कळीत झाली होती. तर घटनास्थळी पोलीस आणि नागरिकांच्या वतीने बस पुलावरून काढण्याचे सुरु होते.