२ मिनिटात होणारी ‘मॅगी’ आता गायब होणार?
भारतात सर्वाना हवीहवीशी वाटणारी ‘मॅगी’ सध्या संकट सापडली असून नेस्ले इंडियाच्या ‘मॅगी’ पॅकेट्समध्ये शिसं (लेड) व मोनोसोडियम ग्लुटामेटचे (एमएसजी) अतिरिक्त प्रमाण आढळून आल्याने देशभरात गोंधळाचे वातावरण निर्माण झाले आहे. या पार्श्वभूमीवर सर्व दुकानांमधून ‘मॅगी’ची पॅकेट परत मागवण्याचे आदेश अन्न सुरक्षा आणि औषध प्रशासनाने (एफीडीए) या कंपनीला होते. मात्र आता या कंपनीने हे आरोप फेटाळत शिसाचे प्रमाण नियंत्रात असल्याचे स्पष्ट केले आहे.
काय आहे नेस्लेची भूमिका ?
प्रेसनोट द्वारा नेस्लेने मांडलेल्या भूमिकेनुसार, वैधता संपल्यामुळे मॅगीची फेब्रुवारी 2014 च्या बॅचमधील 2 लाख पाकिटे परत मागवण्यात आली होती. दर्जा आणि सुरक्षा ही आमची प्राथमिकता आहे. मॅगी नूडल्स हे खाण्यासाठी सुरक्षित असून त्यात शिसाचे प्रमाण नियंत्रणात आहे. मॅगीची काही पाकिटे प्रयोगशाळेत चाचणीकरिता पाठवली असून त्याचे निकाल अजुनही प्रतिक्षेत आहेत. एफडीएने नोटीस पाठवल्याला ‘नेस्ले’ने दुजोरा दिला आहे. मात्र, आम्ही ‘मॅगी नूडल्स’मध्ये मोनोसोडियम ग्लुटामेट घालत नसून, वापरण्यात येणाऱ्या नैसर्गिक पदार्थांमध्ये कदाचित ते असावे, असा दावा कंपनीने केला. टोमॅटो, पनीर, कांदे, दूध, पावटे आणि प्रोटिनयुक्त इतरही अनेक पदार्थांमध्ये ग्लुटामेट आढळते, असेही कंपनीचे म्हणणे आहे. त्यामुळे तुर्तास तरी तुम्हाला मॅगी खाता येणार नाही. पण मॅगीला ऑपशन म्हणून तुम्ही होम मेड शेवया किंवा इतर घरचे पौष्टिक पदार्थ खाऊ शकतात
महाराष्ट्रातही तपासणार मॅगीचे नमुने
मॅगीचा वाद गेल्या काही दिवसांपासून उत्तरप्रदेशात वाढत आहे. मात्र महिन्याभरापूर्वी नागपूर येथील एका एनजीओने याबाबत तक्रार दाखल केली होती. त्यानुसार, महाराष्ट्रातही अन्न व औषध प्रशासनाने मॅगीचे काही नमुने तपासणीसाठी पाठवले असून लवकरच त्याचा निकाल हाती येईल. असे सांगण्यात येत आहे.