मावळ लोकसभा मतदारसंघाचे विद्यमान खासदार गजानन बाबर यांनी शिवसेनेला सोडचिठ्ठी देण्याचा निर्णय घेतला. कार्यकर्त्यांशी चर्चा करून येत्या २२ मार्चपर्यंत पुढील निर्णय घेणार असल्याचेही बाबर यांनी स्पष्ट केले आहे. मावळ मतदारसंघात शिवसेनेच्या उमेदवारीसाठी खासदार गजानन बाबर आणि सहसंपर्कप्रमुख श्रीरंग बारणे यांच्यात स्पर्धा निर्माण झाली होती. अखेर शिवसेना पक्षप्रमुख उध्दव ठाकरेंनी आज (मंगळवार) श्रीरंग बारणे यांना उमेदवारी जाहीर केली. यावर नाराज होऊन गजानन बाबर यांनी पक्षाचा राजीनामा दिला आहे.
आकुर्डीमधील शिवसेना भवनात खासदार बाबर यांनी झालेल्या बैठकीनंतर शिवसेना सदस्यत्वाचा राजीनामा देत असल्याचे जाहीर केले. तसेच गेली चार दशके शिवसेनेचे निष्ठेने काम करत आलो आहे. कोणताही भ्रष्टाचार आजपर्यंत केलेला नाही. जनतेची कामे करत आलो म्हणून मला प्रत्येकवेळी जनतेने विजयी केले. परंतु, शिवसेनेत निष्ठेपेक्षा पैशाला महत्व प्राप्त झाल्यामुळे राजीनामा देत असल्याचे गजानन बाबर यांनी उद्धव ठाकरेंना लिहीलेल्या पत्रात म्हटले आहे.
खा. गजानन बाबर यांचा शिवसेनेला जय महाराष्‍ट्र
