मराठा क्रांती मूकमोर्चा बुलडाणा येथे आज सोमवार २६ ला अखेर निघणार आहे. सोशल मीडिया, तोंडी, जाहिरात, बॅनर द्वारे सर्वत्र गेल्या महिनाभरापासून हाच विषय चर्चेत होता आणि अखेर तो दिवस आला. ह्या मोर्चासाठी जय्यत तयारी झालेली असून जिल्हाभरातून अनेक जण बुलडाणा शहरात दाखल झाले आहेत. बोथा घाटातील अपघात वगळता अजूनतरी कुठेही अनुचित कार्य घडलेलं नाही. मोर्चासाठी तोबा गर्दी होणार हे सर्वश्रुत आहे आणि त्याची जाणीव इतर ठिकाणी झालेल्या मोर्चा मधून दिसून आलेली आहेच.
मराठा क्रांती मूकमोर्चासाठी जयस्तंभ चौकात पूर्ण तयारी झालेली असून पोलीस बंदोबस्त सुद्धा तैनात आहे. सतर्कता व मोर्चा शांततेत आणि कुठलेही अनुचित कार्य घडू नये या करीत पोलीस बंदोबस्त तैनात असून जिल्ह्यातून आणि इतर ठिकाणाहूनही पोलीस कुमक मागवण्यात आली आहे. सर्व कार्यालयीन कामकाज, शाळा- कॉलेज व दळणवळण यंत्रणा सुद्धा बंद होणार आहे. त्यामुळे बाहेरगावी जाण्यासाठी भल्या पहाटेच बुलडाणा शहराबाहेर जाण्याचे आवाहन करण्यात आले आहे. एकंदरीत वातावरण बघून संपूर्ण शहर भगवेमय होणार यात तिळमात्र शंका उरली नाही आहे.