बुलडाणा शहरात किमान २० एटीएम मशीन असतील. त्यामध्ये अनेक मोठ्या बँकासोबत इतर पतसंस्था आणि छोट्या मोठ्या बँकांचे एटीएम आहेत. २ महिन्याआधी झालेल्या नोटबंदीमुळे ही सर्व एटीएम भरलेली असायची. पैशानी नव्हे तर गर्दीने. पैसे असो वा नसो परंतु एक जण आत शिरला की त्यामागे इतर जण असे करता करता रांगच लागायची ती अजून सुद्धा कमी झालेली नाही. बुलडाणा शहरात असलेल्या या एटीएम मशीन पैकी फक्त काहीच मशीन मध्ये पैसे मिळतात तर काही अनेक दिवस तसेच पडलेले असतात. अनेक एटीएम सकाळ ते संध्याकाळ आपली “ड्युटी” बजावतात. संध्याकाळी त्यांचे ‘शटर डाऊन’ होत असते. त्यामुळे लोकांच्या समस्येत अजूनच भर पडते.
प्रत्येक एटीएम मध्ये एक सूचना लिहिलेली असते “एका वेळी एकाच व्यक्तीने प्रवेश करावा” इ. ही सूचना मनुष्यासाठी असते. ती सूचना वाचून तिथे पैसे काढण्यासाठी येत असलेली लोक त्याचे तंतोतंत पालन करतील अशी ‘खोटी आशा’ ती सुचना लिहिणाऱ्यास वाटली असावी. परंतु त्याचा घनघोर अपमान करण्याचा विडा काही सुशिक्षित नागरिकानी उचलला आहे. सुचना असलेली ती पाटी/फलक समोर असून सुद्धा खिशात एटीएम मशीन चे कार्ड घेऊन फिरणारे अनेक बहाद्दर एटीएम असलेल्या खोलीत गर्दी करतात. पैसे काढत असलेल्या व्यक्तीभोवती गर्दी करून उभे राहतात जणू काही त्याला ‘झेड सेक्युरिटी’ पुरवीत आहेत. तर काही जणांना मोबाईल वर बोलण्याचा मोह एटीएम मशीन कक्षात सुद्धा आवरला जात नाही. या ठिकाणी सुरक्षा रक्षक असतो परंतु तो सुद्धा कुठे निघून गेलेला असतो तो संध्याकाळ पर्यंत कळत नाही.
हा वृत्तांत जवळपास सर्वच ठिकाणचा आहे. काही एटीएम याला अपवाद असतीलही परंतु पोलीस मैदाना जवळ असलेल्या एसबीआय च्या एटीएम वर हमखास दिसून येतो. अशा सर्व ठिकाणी सुरक्षा रक्षक हवा आणि त्याने तिथे येत असलेल्या लोकांना मार्गदर्शन करून शिस्तीचे पालन करायला मदत केल्यास परिस्थिती बदलू शकते.