मुलींची घटणारी संख्या ही गंभीर बाब आहे. याला आळा घालण्यासाठी अनेक क्लुप्त्या तसेच गर्भलिंगनिदान बंद करण्यात आले आहे. आधी सर्रास दिसणारी सोनोग्राफी सेंटर सुद्धा बंद झाली आहे आणि कारवाई होण्याची भीती असल्याने अनेक डॉक्टर सुद्धा यापासून दूर राहणेच पसंद करू लागलेले आहेत. गर्भपात आणि त्यामुळे होणारी मुलींची कमी संख्या यामुळे शासनाने ‘बेटी बचावो, बेटी पढाओ’ ही योजना सुद्धा चालू आहे. तसेच अनेक सामाजिक संघटना यावर कार्य करताना दिसून येतात. काही ठिकाणी तर डॉक्टर सुद्धा मुलगी झाल्यास दाम्पत्याकडून फी घेत नाहीत.
असंच काही केळवद ता. चिखली येथील युवकाने ठरविले आणि मुलगी वाचण्यासाठी आपले योगदान दिले आहे. केळवद ता. चिखली येथे उद्धव गाडेकर यांचे हेअर कटींग सलून आहे. याठिकाणी त्यांनी जर कुणाला मुलगी झाली तर त्या मुलीच्या पित्यास सहा महिने दाढी-कटिंग मोफत तर त्या मुलीचे जावळे सुद्धा मोफत काढून देऊ अशी संकल्पना करून ‘बेटी बचाओ’ या अभियानास त्यांनी साद दिली आहे. त्यांचा हा उपक्रम वाखाणण्याजोगा आहे. इतरांनी सुद्धा त्यांच्या ह्या उपक्रमातून शिकले पाहिजेत. अशा प्रकारे जर प्रत्येकाने आपला सहभाग दिला तर नक्कीच लवकर मुलींच्या घटत असलेल्या गंभीर समस्येला आळा बसण्यास मदत होईल.
